أووووووووووووووووووه مصرااااااااااوى

يا جماعه

انا بعترف

ان عمرى ما كان ليا ف الكورة

ولا ماتشات الكورة

-اللهم الا الكورة البلاستيك اللى كنا بنلعب بيها ع السلم ونكسر لمبة الجيران ونجرى على بيوتنا نستخبى-

ولا الناس اللى بتشجع الكورة

بل وبالعكس

انا -سورى يعنى-

بستهيف الناس

اللى قايمة نايمة على ماتشات الكورة

وشغلها الشاغل ف الحياة

ماتش مين مع مين جاى الساعه كام

ولا التعصب والشتايم

والناس اللى بيموتوا بسكتة قلبية عشان حتة ماتش

طول عمرى بقول

ايه المتعه ان 22 واحد(شوحطة) جمع شحط يعنى

عمالين يتخانقوا على حتة كورة لا راحت ولا جات زى العيال الزوغيرين

واتحرق دمى جددددددددااااااااا

ساعات احداث مباراة مصر والجزائر الاخيرة

وازاى ماتش يعمل ف شعبين كده

وبيبن كمية الكره والتعصب اللى فينا دى كلها

لدرجة توصل للدم و ترويع الابرياء!!

وحصل معايا انا شخصيا

موقف زودلى الاحساس ده

لما مصر كسبت الجزائر المرة الاولى

وساعتها من حظى الاسود كان شفتى ف الصيدليه

وخفت طبعا اروح لوحدى

لحسن اتاكل

وما اضمنش اروح بيتنا سليمة

كلمت ماما تيجى تاخدنى

لقتها بتقولى

من غير ما تقولى

انا بقالى اكتر من ربع ساعه بحاول اوصل للصيدليه

ومش عارفين

لان الناس ف الشارع

بيحتفلوا بالنصرررر العظيم و فتح عكة

بأنهم بيرموا على الناس اللى ف عربيات

بنزين ونار!!

وحاجات عجيبة كده

المهم بعد ما وصلوا

وركبت الحمد لله

كانت معجزة تانية اننا نوصل بيتنا

لاننا اتحاصرنا ف شارع

من

خيرة شباب البلد!!

اللى خلونى كرهت الكورة باللى اخترعها

مش هاعرف احكيلكم المنظر

وحالة العياط الهستيرى اللى جات لاختى الصغيرة

من هجوم الشباب اللى زى الورد دول علينا وعلى العربيه

زى ما نكون احنا الاعدااء!!!!

الله اعلم كانوا ضاربين ايه ولا مبرشمين ولا هى دى فعلا مظاهر الاحتفال

لحد ما جه ظابط شرطة نزل علينا من السما وخلصنا من ايديهم

بعد ما كنت خلاص بتلو الشهادتين

ساعتها بجد رجعت البيت قرفانه

وكل ما حد يقولى مبروووك لمصر

ابقى نفسى اولع فيه

واقوله بلا وكسة

و جتكوا القرف مليتوا البلد!!

بس

سبحان الله

النهارده فعلا

انا مبسووووووووووطة

جدااااااااا

ان احنا كسبنا الجزائر

لانى حاسة فعلا اننا اتظلمنا وماخدناش حقنا المرة اللى فاتت

حسيت قدرة ربنا

مش شماتة ولا حاجه

بس هما يستاهلوا

انا اه معرفش حاجه عن الكورة

بس عارفه

انها اكيد مش لعبة (تكسير عضم ) الفريق التانى

الخطة اللى بيعتمدوها ف لعبهم

واللعب بغباوة

حتى يتساقط اكبر كم من الفريق المنافس كالذباب

مش مهم بقى ناخد كاس افريقيا ولا لأ

المهم بس الناس كلها تشوف مين هما ومين احنا

و

مبروووووووووووووووووووووووووووك لمـــــــــــــــــــــــــــصــــــــــــــــــــــــر

اه وربنا تعبت

لماذا أسلم للبحر أمرى؟؟

وأمنح للريح أيام عمرى

...

وهل فى البحار

سوى العاصفات

تروح بلؤم

و تغدو بغدر

..

وكيف أصادق فى الصبح مدا

وفى الليل أمنح ودى لجزر

..

..

تعبت من البحر

لكن

قلبى يصر على البعد عن بؤس بر

لمــــــــــــــــــــــــــــــــــاذا؟؟!

***

**

*
حد عنده اجابة للسؤال الابدى المستفز جدا ده

لماذا؟؟

يا سلام عليك يا كاظم وعلى اسئلتك اللى ملهاش اجابة دى

وانا طول عمرى ما بحبش العيل اللى بيتعب اهله

ليه نعمل كده فى نفسنا

ليه ابقى عارفه ان الشوربة لسه سخنة مولعه و أكيد هتلسع منها وبرضه لازم

ألسع نفسى كل مرة

ليه ابقى عارفه ان المفروض اقف قدام اللبن عشان ما يفورش ويغرق الدنيا

و برضه اطلع ابص لثوانى على التليفزيون

عشان طبعا ارجع الاقى المفاجأة المتوقعه

ان اللبن فااااااار D:

ليه ابقى عارف بالحاسة السادسة

((اللى عند الستات اللى عمركم ماانتم يا رجاله هتعرفوها..))
أنى المفروض ما اعملش الشئ ده

اللى غالبا هينتج عنه كارثة طبيعيه

بس مش بسمع كلام نفسى غير بعد فوات الاوان

لما تطلعى لسانها وتقولى

I told u so

امتى هتعلم اسمع كلامى

وابطل السع نفسى

...

..

Be Happyyyyy

السنة اللى فاتت كنت بقولك

عيدٌ بأى حال عدت يا عيد

السنة دى الوضع ما اتغيرش كتير

زى ما هو ويمكن أسوأ

بس

انت ايه ذنبك

وانت بتيجى كل سنة مرة

وعمر ما كان العيب فيك انت

عشان كده السنة دى

قررت افرح بجد

فرحه لمجرد الفرحة بيك

فرحة العيال الزوغيرين

بالعيديه واللبس الجديد

والصواريخ والبمب كمان

هافرح بيك حتى لو يوم واحد

وهاعمل كل الطقوس القومية العياليه عشان اعبر عن فرحتى بالعيد

مش هانام وافوت صلاة العيد

وهالبس اللبس الجديد اللى نزلت النهارده مخصوص ف الوقت الضايع

واستحملت الزنقه والخنقه ف الشوارع عشان اجيبه

واكيييييد هاخد العيديه من كبار العايله

وهاجيب لعب جديده لملايكتى الاتنين

أحمد وعلى الدين

هافرقع صواريخ مع العيال

وانفخ ف بلالين لحد ما اقطع النفس

هاكلم اصحابى كلهم

واحاول اخرج مع شوية منهم

اممممممم

السنة دى قررت أاقولك وانا بطلع لسانى لأى حاجه ممكن تضايقنى

العيــــــــــــــــــــــد فرحــــــــــــــــــــــــــــــــة

:):):)

كل عيد وانتم فرحانين

فلاشات سريعه

لما شفته دخل المطعم قبل الفطار بدقايق

كان راجل كبير فى السن ولوحده

استغربت اوى

لان المطعم ده شبابى شوية

وكمان عائلات

ده غير انه رمضان

يعنى متهيألى ماحدش بيفطر لوحده ف رمضان

قعدت اراقبه وانا بسأل نفسى ياترى ايه قصته

دخل قعد على كرسى عالى جنب البار(بار للشاى والقهوة مش حاجه تانى)

ولما المغرب أذن

يدوبك فطر على شوربة وبس كانت هى فطاره

وكانت مشكلته أنه عايز يشرب ميه

لكن مش عارف يفتح غطا الازازة البلاستيك

وانا سبت الدنيا واللى فيها وركزت معاه

ونفسى اقوم اساعده وافتح له الازازة

بس خفت احرجه وبالتالى احرج نفسى

قعدت اراقب بعينى حركات الجرسونات

رايحين جايين يشوفوا طلبات الناس من غير ما يفطروا هما حتى

وبحاول احركهم بقواى الذهنيه-الخارقه طبعا-

عشان حد فيهم يلتفت ليه

ماحدش اخد باله منه ومن معركته مع ازازة الميه غيرى

وهو ايده عماله ترتعش وبيحاول يفتحها برضه

كنت عامله زى اللى بيتفرجوا على ماتش وبينفعلوا اوى مع اللعيبه

تعال يمين ..بص هنا ..روح له بقى

كل ده للجرسونات بصوت واطى

لحد ما اخيرا

عمو ده

تنازل عن كبرياءه

وشاور لواحد فيهم

انا عايز اشرب ومش عارف أفتح ازازة الميه

ياااااااااه انا كده ارتحت

أد كده الانسان ضعيف

ولا حول له ولا قوة

لكن سبحان الله

عنده عزة وكرامة وكبرياء

وأحيانا كِبر كمان

يخليه مش مصدق اد ايه هو ضعيف اوى

وحاجه صغيرة اوى

ودايما دايما

محتاج لحد يكون معاه

ياااااارب

جمعنا دايما على حبك وطاعتك

وما تحرمناش من اللى بنحبهم وبيحبونا

بس خلاص

***

*

تم هلالك بدرى...والأيام بتجرى

ياااااااااه

انت ماشى خلاص؟؟

أول سنة تعدى عليا كده من غير ما أحس بيك خالص

والغريبة انى كل ما اقول لحد كده

يقولى وانا كمان

أول مرة تعدى عليا يا رمضان بعد ما اشتغلت

ده طلع الموضوع صعب اوى

شغل الحكومة الصبح

والصيدليه بليل

يبقى امتى بقى هاحس بيك :(

أنا آسفه جدا وزعلانه على نفسى

ماعرفتش أديك حقك

ولا حسيت ببركتك وفرحتك

وحشتنى يا رمضان زمان

لما كنت لسه زوغيرة

ايام ما كنا بنتجمع كلنا ف بيت جدو-الله يرحمه-

هما فاكرين لما يرجعوا بوجى وطمطم يعنى

هيرجعولى رمضان زمان

ياااااااااااااارب

بلغنا رمضان الجاى

ويكون حلمنا اتحقق

P.S

انا مش عارفه مين الفنان اللى رسم الصورة دى

بس تسلم ايده

لانها شبه فانوسى جدااا

يارب

السنة الجاية

نبقى مع بعض

رمضان كريم

بركاتك يا شيخ اوباما

مش عارفه ليه الازعرينه اللى عاملينها دى كلها يا عمو مستر بريزيدنت اوباما

هما كانوا فاكرينك -ولا مؤاخذة-

هارى بوتر بجلالة قدره

وهتيجى على صهوة مقشتك ماركة Air Force One

ومعاك الماجيك واند بتاعتك-اللى هى العصاية السحرية للى مش بيفهموا فصحى-

وبضربة معلم واحده

هتحللهم كل مشاكلهم

وتطلع اليهود من فلسطين

والامريكان من افغانستان

ومفيش مانع تحرر الشيشان

ما هى لعبت بقى

وكل اللى ليه عند حد حاجه

يجى يقدم طلبه ومعاه معزة وفرختين-بلاش خنازير دلوقتى-

ولا كأنه شيخ وليه بركات كمان

ليه اتهمتوه انه جاى يكدب علينا وينيمنا ويضللنا

مين قال اصلا

انه هو ف ايده حل لكل مشاكلنا

على اساس يعنى ان احنا مستنيين ان حد يجى يحل لينا مشاكلنا اللى استعصت علينا

والله ولا اجدعها اوباما يقدر

حد قال ان الامريكان بجلالة قدرهم برضه

انتخبوه واختاروه

عشان بس يجى يشوفلنا احنا مين مزعلنا ويراضينا

ويحل لينا خلافتنا

يعنى الراجل سايب مصالحه واراضيه

وشغله المتلتل والمواشى اللى اتسمت والعزب اللى غرقت

عشان يكلمنا كلمتين
ويوجه رساله

لكن لا قال انه ف ايده حل ولا اى حاجه

مستنيين منه ايه يعنى

الراجل ما كدبش ولا حاجه وقالها صراحة

بالمفتشى كده

العلاقة والبوند بينهم وبين اسرائيل

Unbreakable

وزى السمن على العسل بالطحينه كمان

كانت ومازالت وستظل

دى اسرائيل

اسرائييييل

اللى هى اغلى عليهم من ننى عينهم

ومن ضناهم

هيعاديها عشان سواد عيوننا

وهو فعلا فى ايده ايه

ده مجرد رئيس دولة-ومش اى دولة-

مش معقول هيغير سياستها لسنيييين

ده لو فكر بس فكر

انه يعمل حاجه وكانت ف صالحنا وتتعارض-واكيد هتتعارض-

مع مصالح امريكا واسرائيل

مش هيسبوه يا ضنايا ينطقها

ولا هيلحق يتهنى بشبابه ويجوز بناته

بصراحه الراجل عداه العيب

بجد عقلية تحترم

ثقافة ايه ولباقة ايه وسياسة ايه

مش زى الحم.. اللى قبله واللى قبل اللى قبله واللى يتشددلهم

اللى كانوا بينطحوا مش بيقولوا خطب

انا عن نفسى

فى الواقع احم احم

ومن موقعى هذا-وموقعى هذا حر جدا على فكرة-

اعلنها

انا فعلا احترمته وانبهرت باسلوبه اللى يخلى ابراهيم الفقى يقعد ف بيتهم

لأ انا مش فرحانه بيه زى ما الناس بتقول

بالكام آية اللى قالهم

ولا حكاية ان احنا زدنا حته لما هو قال السلام عليكم

بس كفايه انه من الذكاء انه يتنازل عن

الغرور الاذلى المتخلف بتاع اللى قبله-بين قوسين بوش-

ويحاول يعرف عن الناس اللى جاى يكلمهم

ويعلن ليهم انه بيحترم دينهم واسلامهم ولغتهم

ويعرف قيمتنا وقدرنا وان بلاده اكيد اكيد هتستفيد

لما تبقى على وفاق مع العالم العربى والاسلامى(وهو ده اللى جابه)

بيحاول يصلح اى حاجه من العك اللى نيله بوش بغبائه(مش عارفه يا اخى نفسى اشتمك بس مش لاقيه حاجه تليق عليك زى الغباء)

اى حد يحترم دينى واسلامى

احترمه انا كمان

حتى لو كان عدوى-ده لو هو فعلا عدوى-

واول ناس هتتأثر

مش احنا

لأ شعبه

لما يلاقوا رئيسهم بيحترمنا كده وبيحترم دينا كده

هيغير لهم فكرة بوش-البعيد- الاذلية اللى زرعها فيهم

ان المسلمين دول شوية ارهابيين يستاهلوا الحرق

من الاخر

لازم نحسدهم على عقلية زى عقلية اوباما

يارب بس ما يخيبش ظننا ويصاب بحالة البلاهة البوشية

بس خلاص
...

أول يوم

أخيييييييييرا..وبعد طول انتظار(انتظار من كل اللى حواليا مش منى خالص الحقيقه)

بعد إضراب عن العمل قارب على سنة كاملة (كنت بفكر اكملها سنة عشان الحسد)

من تاريخ تخرجى من كليتى الحبيبة

قررنا نحن

نحن مين

انا بس يعنى

Upendi

الخروج من القوقعه السريرية

والتغلب على الاكتئاب الأذلى

وعلى مخاوف وهواجس دفينة

قرارات مصيرية فى انتظار أن اتخذها

نوت اونلى (حلوة نوت اونلى دى) مصيريه ف حياتى

لكن اكيد ف حياة ناس لسه ما شفتهمش ولا شافونى

بس ناوية أأُثر ف حياتهم..وربنا يستر عليا وعليهم

سنة كامله مرت بين التننططه مع اصحابى ف الصيدليات (قال يعنى بدرب!!)

وبين الأنتخه ف بيتنا وانا لسه عندى احساس انها اجازة وهتعدى

وهرجع الكلية تانى

بقت بحقد على الاطفال وهما رايحين مدارسهم والاطفال برضه اللى رايحين كلياتهم

واللى يقولى فيهم يا بختك ..نفسى اتخرج واخلص

ابقى نفسى أغزه..أعوره..اعمل فيه حاجه وخلاص

اه يعنى..ما انتوا مش عارفين ولا مقدرين النعمه اللى انتوا فيها

المهم

بعد سنة كامله الناس عماله تقولى يا دكتورة يا دكتورة من غير ما اعمل اى حاجه تدل على انى كده فعلا(اللهم الا الشهادة اللى بتثبت انى معايا بكالريوس صيدله اد الدنيا) وقبلهم 5 سنين ف الكلية برضه يا دكتورة

ونفسهم ومُنى عينهم يشوفونى وانا دكتورة بجد

قررت اعمل بلقمتى...قصدى بلقبى واستحقه

مع انى عارفه ومتاكده اول ما هانزل النهاردة وابدأ شغل اللى هو بجد بقى

هاتحول بقدرة قادر من دكتورة ل(أبلة)

بس عاااااادى جدا

لا تبالى لا تبالى

يارب استر النهارده

ادعولى ياللى بتقروا(حتى لو كان واحد بس هو اللى بيقرا D:)